تنبيه

تــنـبـيـه ... كــل ما يـنـشر بهـذه المـدونـة مـسـجـل من قـبـل حـقـوق الـمـلكـية الفـكـريـة و أي اقـتـبـاس او نـقـل لمحتـوى المدونـة يعرضــك للمسـائلـة القـانـونـيـة

الأحد، 29 يونيو، 2008

تصدقـــوا جالــي تاج



لأول مرة ها خرج برة نطاق الشعر و القافية في هذه المدونة و أقول كلام مش منظوم بس ها يكون طالع من القلب زيه زى الشعر و يا رب ما كونش تقيلة عليكم في البوست ده

بما أن هذا التاج وصلني من السيد الأستاذ الدكتور المحترم جدا فارس بلا جواد فأحب أن اشكره شكر خاص لأنه أول من عبرني بهذا التاج

و أيضا بما أن السيد الأستاذ الدكتور المذكور أعلاه هو قدوتي في هذا التاج فإقتداء به أنا حطيت صورتي و أنا صغيرة بما انه حط صورته و هو كبير

بسم الله نفتتح الجلسة

س .اذكر أحلاما تخص ماضيك كنت ها تتخلى عن أية فيها و ها تتمسك بأية لحد دلوقت ؟؟؟؟

ج .

* كنت بحلم و أنا صغيرة أن لما اكبر اشتري ارض كبيرة ازرعها زراعات تفيد مصر و مش مرشوشة عشان صحتنا تكون أفضل و جنب الأرض مدينة سكنية يكون اللي ساكنين فيها ناس طيبة قلبها ابيض بيحبوا مصر و بيحبوا بعضهم يزرعوا الأرض دي بحب , و كنت عايزة مادخلش جنس عربية ولا أتوبيس في المدينة كنت ها عمل المواصلات بالحنطور عشان أحافظ علي التوازن البيئي و ما ألوث البيئة و كمان عشان كل الناس تتحنتر براحتها .

و لما كبرت شوية اكتشفت أن الباشمهندز أفلاطون فكر في الفكرة دي قبلي و سماها المدينة الفاضلة.

و لما كبرت شوية كمان اكتشفت برده أن الحلم ده لا يمكن تحقيقه في الزمن الأغبر اللي أحنا فيه .


* من صغري و أنا كان نفسي اطلع مهندسة ديكور كنت اقعد افن في شقتنا و شقة اقرايبنا خاصة أنهم بيستشيروني في الموضوعات دي علي طول , لكن ماحصلش نصيب و درست آثار.
و بعد ما انتهيت من الدراسة رجع الحلم تاني أني ادرس ديكور و بشوف دراسات حرة في الموضوع ده و اللي يعرف بجد حاجة بخصوص الموضوع ده يا ريت يقول لي .


* بحلم انزل كتاباتي في كتاب سواء بقي شعر أو قصة , و بتمني أن لوحاتي الفنية تتعرف و تبقي مشهورة.


* من صغري و أنا باحويش فلوس عشان ابني بيها جامع يكون صدقة جارية أو مدفن يكون لنفس الهدف , لكن لسة الجرشينات علي قدها فا ربنا يقدرني و اقدر ابنيهم.


* كان نفسي أعيش في زمن تاني زمن الناس فيه طيبة مش خبيثة ولا شريرة زى دلوقت , كان نفسي الناس تحب بعض و تخاف علي بعض .


* كان في حلم مجنون أو اقدر أقول عليه رغبة نفسي اعملها من زمان و أني اقفز قفزة ثقة من فوق برج أو كوبري أو حتى بباراشوت من طيارة.


أكيد في أحلام تانية صغنونة بس أنا مش فاكرة غير دول دلوقتي.


س . اذكر أحلام تخص مستقبلك ؟؟؟؟
ج.

* ادخل أنا و أهلي و امة المسلمين أجمعين الجنة برحمة من ربنا و مغفرة من عنده . ده بالنسبة للحياة الاخري أما الحياة اللي أحنا عايشين فيها:-


* أتمني ربنا يرزقني بزوج صالح يحبني و يحترمني و يكون أب فاضل لأولادي.

* أتمني أن ربنا يرزقني بذرية صالحة يفيدوا مجتمعهم و يدعو لي لما أموت .


* بتمني ألف العالم كله و خاصة ايطاليا و روما لأنهم كانوا دراستي و علاوة علي ذلك فانا بحبهم أوي لأني بحب أي حاجة فيها تاريخ و أصالة و تراث.

* بتمني اكفل طفل يتيم و إن شاء الله ربنا يقدرني و اقدر.


* نفسي أول ما أتجوز اطلع أنا و جوزي عمرة نمسح بيها كل ذنوبنا و نبتدي بيها صفحة جديدة في حياتنا.


* نفسي ربنا ينصر المسلمين علي أولاد اللذينا اللي قرفنا و مطلعين عنينا و يوحد صفوفنا و يقوينا عليهم.


س. اذكر شخصين متواجدين في حياتك كنت تتمني وجودهم من قبل ؟؟؟؟

ج. طبعا صحابي اللي طلعت بيهم من الدنيا آية و شرين كنت أتمني وجودهم معايا من و أنا في المدرسة بس بجد رغم إني اعرفهم يجي من خمس سنين إلا إن معزتهم في قلبي زى معزة أهلي بالضبط , حبيبي وماستحملش عليهم الهوا .


س . اذكر شخصين غير متواجدين في حياتك و تتمني وجودهم مستقبلا في حياتك و حياة اولادك ؟؟؟؟

ج. طبعا وبلا شك و أحب أن انوه و أصر و أأكد علي النقطة دي شخص غير موجود أكيد جوزي و أتمني طبعا وجوده في مستقبلي و ربنا يبعت واحد يا رب عشان خلاص الواحد خلل في بيت أبوه.
و أتمناه برده لعيالي هو حد يكره.



يا رب ما كونش طولت بجد تاج جميل و بشكر لتاني مرة دكتور فارس لأنه أداني فرصة اكتب حاجات عمرها ما خرجت برة نافوخي و ما حدش يعرفها

و بهدي التاج لكريم عشان شكله مكتئب من الامتحانات
و للفارس الملثم
و لقلب مصري
و كل اللي يزورني و يحب يجاوب علي التاج

الخميس، 26 يونيو، 2008

قــــلبك عنــوانــي




أجئت في الليل زائراَ أم ساكناَ جدران قلبي


إن كنــت ســـاكناَ فهـــل أتـــيــت بالمــؤنِ


هــل لي برمشـك أتلحف به في برد الليالي


هــل لي بكتــفك أتوسده بحب و قلب حَاني


هــل لــي بكـفــك تمـســـح عنــي أحزانــي


هــل لــي بــدمــعك يغـســـل عنــي ألامــي


هــل لي بشـفتك تشدو لي أعذاب الأغاني


إن كــنت ساكــناً فهــل لـي بقلبك عنواني
بقلم / هاجر العشري

السبت، 21 يونيو، 2008

صـــرخة زمـــن




بلمسة سحرية في قلب التروس

عقارب الساعة دارت علي الرؤوس

أتبدل الزمن و أتغيرت نفوس

نفوس كانت زمان مرفوعة الرؤوس

كانت زمان نبراس تضوي كما الفانوس

كان كل شيء في مكانة متأني و مدروس

* * * *

رجعت التروس و دارت تشوف هنا النفوس

لقت نفوس جريحة منكسة الرؤوس

و نفوس علي الغلابة منفوشة كما الطاووس

و نفوس على الأذية واخده فيها دروس

و نفوس بتقول ضحية لعبت بينا النفوس

و نفوس بايعة القضية متلهفة ع الفلوس

* * * *

وقف الزمن في مكانه و تحجر من الخوف

هل في الحياة بقية طول ما فيها خسوف

خسوف في نفوس بغية متسلسلة بالظروف

عايشه بس منسية عايشه جوه كهوف

كهوف كانت زمان مهجورة من ألوف

لسه نفوسنا الرضية عايشه فيها تطوف

* * * *

لا يا زمن اهرب ... اهرب و يا الحروف

حروف التاريخ رفضت ترصد مصير معروف

مصير خلي الزمن و يا التاريخ مكسوف

طول ما النفوس بتقول الزمن زرع فينا الخوف

عمر التاريخ ما ها يغفر ولا يوم تبان له حروف

صرخ الزمن يرفض مصير منسوف
بقلم / هاجر العشري

الأربعاء، 18 يونيو، 2008

أحـــلام صبــيـة





فكت شرايط الضفاير


لعبت النسمة بشعرها الطاير


طاير في الحلم و المصاير


* * * *


سابت خلاص كراريسها و أقلامها


حلمت خلاص بالكوشة و فستانها


و عريسها يجي في وسط الزفة يحضنها


* * * *


عرف طريق الكحل لعيونها


عرف طريق السهد أجفانها


عرف الحب يحلي أيامها


* * * *


أتلونت الشفايف بالأحمر البديع


و تبسمت لحبيبها و اعترفت للجميع


أن الحياة بدونه حياه بلا ربيع


* * * *


حطت خلاص الأحمر ع الخدود


حطت الطرحة و مسكت الورود


و برفعة الطرحة أحلام ما لهاش حدود


* * * *


اكتملت المعاني و أتحقق الأمل


أتحقق حلم غالي ما توصفه جُمَل


حلم صبية بتحبي في طريق نوره الأمل
بقلم / هاجر العشري

الاثنين، 16 يونيو، 2008

أخر لخبطة




شخبطة لخبطة

الدنيا أخر شحطتة

فيها خطوط متشخبطة

و خطوط واقفة متظبطة

و خطوط سارحة و مستعبطة

و خطوط في الجو مشعبطة

* * * *

و خطوط طالعة نازلة علي السطور

و خطوط ترسم لك بحور

و حروفها دايرة في طبق بنور

فيها الكلام زى الصقور

و فيها حملان واقفة طابور

و فيها تعالب دايرة تدور

* * * *

حلقة لكن متخططة

فيها اللي فرحان زئتطة

و فيها اللي شقيان مرمطة

و فيها اللي عايشها هامبكة

شخبطة لخبطة

الدنيا أخر شحطتة
بقلم / هاجر العشري

الجمعة، 13 يونيو، 2008

رقصــــات تحـــت المطــــــــر




في برد الليل في عز الوحدة و العزلة في ليل طويـل


في بـرد الليل و دق الساعة بتقرب لأخــر اللــيــل


و أنــــا بالـــشــــرفة بـــتــونس نجــــوم الليـــــــل


و نقطـــة مطــــر باســــت خدي تـــدفي الليــــــل


و صــوت قالي تـــيجي نجري في مطـر الليــــل


و فجاء لقيتني في الجنة و توب الفرح بقي تــوبي


و أيد حضنت أنا كفي و بصت جوه في عيــوني


و نغمة حب بتقرب و داعبت أذني و سكــونــي


علي سحابة سوي رقصنا و مطر الحب يتهادى


و نتـــسابق علي نجــمة بتضوى جنب قمــرية


لمست النجمة أنا قبله بفرحه بقلـــبي و عيونـــي


بكفه حضن أنا خصري و شفت الدنيا في عيونه


و طبع الحب علي خدي وغبت في حضنه و حنانه


و مال البـــدر بدلاله يصحــي الشـــمس بجمالـــــه


فمـــدت يدهـــا تتثاءب فجــف المـــطر و تبخــر


و غاب أمـــــير أحلامــــي مع البدر في زمن تاني
بقلم / هاجر العشري

الأربعاء، 4 يونيو، 2008

اخــتيـــــــــاري




خلصت خلاص و بختياري

أخـــر كـــلام و ده قـــراري

هابعد و أنا بداري انكساري

آيوة اتجرحت لكن ها داري

آيوة أتهــدم حبــي و داري

آيوة أتقلــــب ليلي نهــاري

لكـــن أنا راضــية بحالـــي

و بقلبي ها غني احلي موالي

طبعا ده يوم فيه انتصـــاري

يـــوم ما أشوف قلبك يلالي

و دمع عينك علي الخد جاري

و تيجي تقول بعدك دماري

لكن خلاص راحت ليالي

صبرت فيها و الصبر غالي

أنا ها نسحب ذوق احتمالي

اللي خلص و ياك يا غالي

خلصت خلاص و بختياري

إهداء
إلي المتمردة
التي رفضت أن تكون تابعة
بقلم / هاجر العشري

الأحد، 1 يونيو، 2008

كــــان فــي يـــوم حــبيــبي



أعرفك بحبيبي

قصدي اللي كان في يوم حبيبي

أعرفك باللي قال ها يكون نصيبي

أعرفك باللي ياما قال بَحبكِ

أعرفك باللي قال في حضن قلبكِ

كل الحياة ماتهمنيش

ماتسويش مدام في قربكِ

أعرفك

كل الأمان كان حلمي ألاقيه بين أيديه

كل الحنان كان بيلاقيه بحبي ليه

كان حلم أفضل طول حياتي بس ليه

كان حلم عندي أعيش و أموت قدام عينيه

ولا كنت أفكر أن يوم ها يخون و يغدر

و لا كنت أفكر أن يوم علي البعد يقدر

وأن الحياة هاتمرو هاموت مش بين أيديه

أعرفك

إهداء
إلي من أخلصت في حبها فغدر بها
إلي من أحبت من كل قلبها فَكٌسر قلبها
إلي أية الحب و الوفاء
إلي صديقتي الغالية ......

بقلم / هاجر العشري