ســــــــت الحســــــــــــــــــــــن

جوز و لوز
و كيلو موز
ندر رموز
لو جالها جوز

* * * *

ها تموت و تاخد فارس هُمام
يكون بعمة و داقق حمام
غني و مجدع و عنده علام
و أخلاقة تبقي صح و تمام

* * * *

لكن يا حسرة ها تجيب منين
و القطر فاتها يجي من سنين
و اللي زيها متجوزين
و الناس شامتة و مش ساكتين

* * * *

أمها قالت دي كدة ملبوسة
دي حاجة واضحة أهي و محسوسة
و أنا مُنى قلبي أشوفها عروسة
يا ختي اسم الله من العين محروسة

* * * *

أبوها قال شدوا الرحال
و علي مصر نروح في الحال
نشوف شيخ يفك أعمال
و ها تبقي فُل و عال العال

* * * *

قُصر الكلام خدوا بعض و سافروا
و في الزحام اهو مشيوا و عافروا
و في الميدان وقفوا و اتحشروا
و ع المقام في الدعاء أتفتحوا

* * * *

مدد يا ست الكل يا زينب
علي مقامك فرشت عنب
و جوز و لوز مليت العلب
لجل ما اطلب منك طلب

* * * *

نفسي أتجوز و استر حالي
و أعيش بقي و اربي عيالي
قعدتي دي فوق احتمالي
أمتي يا رب ترأف بحالي

* * * *

يا أهل الخير ما تعرفوا شيخ
يكون بركة و له تاريخ
و يعرف جن من المريخ
يفك عمل ملضوم في سيخ

* * * *

نط قوام الشيخ بهلول
ايوة يا عمدة طلبك قول
فك السحر أنا فيه مسئول
لكن فكه ده له أصول

* * * *

عايز خروف يكون سمين
و بطة بلدي و ديك حزين
و نملة عانس و شجرة تين
و شقة بحري و يا ريت دورين

* * * *

أمرك مجاب و من سُكات
ده مالفلوس عندي ألوفات
و ارض ملك في الواحات
ها يروحوا لبنتي بعد الممات

* * * *

يا دي الهنا الحظ ندا لي
و في العز ها تصحي أمالي
ها تجوزها و ارضي بحالي
و في النعيم ها عيش ليالي

* * * *

خلاص يا حج العمل أتفك
و كل باب للسحر أتسك
و لو في قلبك ذرة شك
يبقي في شرفي حَكيت حك

* * * *

و اسمح يا عمدة اطلب أيد
ست الحسن و ابقي سعيد
ها بقي العبد و هي السيد
ده أنا من غيرها ها كون شريد

* * * *

يا فرحة قلبي اليوم ده عيد
جالك يا بنتي عريس وحيد
حظك يا بت بومب و شديد
و ها رضي بيه و لو ع الحديد

* * * *

هُب و فجأة طب البوليس
اتاري الشيخ راجل خسيس
نصاب و سكري قريب إبليس
و فيش سوابقه مكربس كرابيس

* * * *

نافوخنا أفشت فيه ترابيس
ما عادش ليكي يا بنتي ونيس
كان يوم زفافك يوم الخميس
لكن خلاص طار العريس

بقلم / هاجر العشري