تنبيه

تــنـبـيـه ... كــل ما يـنـشر بهـذه المـدونـة مـسـجـل من قـبـل حـقـوق الـمـلكـية الفـكـريـة و أي اقـتـبـاس او نـقـل لمحتـوى المدونـة يعرضــك للمسـائلـة القـانـونـيـة

الأحد، 27 يوليو 2008

الاهلي فوق الجميع



اعذائي المشاهدين
اللي قاعدين و واقفين
و للماتش مستنين
في مدرجات الفريقين

* * * *

معاكوا مذيعكوا عدالة
ع الماتش ها قول قوالة
و ها خلي الجمهور في حالة
من الذعر و الاشتغالة

* * * *

فاضل ع الماتش خمسة
ده مدرب بيحط لمسة
و التاني بيهمس همسة
خايف لا يشيلوا خمسة

* * * *

كابتن هولمان ع الدكة
بيحط خطة سَكة
لجل ما يدكوا الدكة
من الأهلي في كل سِكة

* * * *

ها نجيب جوزية علي بوزوه
و اجوجو أكيد ها نعوزه
ادعكله يخرج من كوزه
و أنا مالي أيدي من فوزه

* * * *

بركوتة لازم تكسيره
و فلافيو تهدوا في حيله
و جمعة نكسر منخيره
و اينو واجب تأخيره

* * * *

علم و جاري التنفيذ
كابتنا ده شكله لذيذ
و ها يفقع كدة و يغيظ
ها يشوفوا الحمر التلاميذ

* * * *

و جوزية بيحط الخطة
و ناوي لهم نية شطة
ما هو عمره ما كان بروطة
و ها يجيب لعدوه زغطة

* * * *

و ثواني و بدء الماتش
و بدأها العبدي بلطش
و فلافيو حصل له كلابش
و ع الأرض و نزل فرش

* * * *

و شوية و لاطش تاني
كارت احمر بان في ثواني
هاج الجمهور من تاني
يا حكمنا آه يا حقاني

* * * *

رقص و زود شطة
ده اينو حط الحطة
جاب لعدوه الجلطة
و جونه كانت ولعة شطة

* * * *

و شوية و خلص الماتش
كالعادة افشنا افش
الكأس لأحسن ماتش
يا أهلي يا صاحب العرش

* * * *

و التاني يا عيني عليه
كالعادة خيبتها عليه
الله يرحم والديه
طول عمره ها يموت عليه

* * * *

يا زمالك يا كتكوت
فريقكم أصبح هالفوت
و مالخسارة ده ها يموت
يا عيني عليك مكبوت
* * * *
و الاهلي فوق الجميع
بقلم / هاجر العشري

الأربعاء، 16 يوليو 2008

جالا جالا جالا



جالا جالا جالا

قالك أية قالك آه

قالك يا بن ادم ها نوريك العجب

زمن العجايب و قلة الأدب

زمن الأصول فيه ولا و ذهب

و الحق فيه خلاص احتجب

و الخير فيه يا سيدنا أتنهب

و الشرف فيه راح و أتسلب

و إذا عرف السبب بطل العجب

* * * *

لما الضمير في قلب الجدع يترشى

و لما الحلال في لقمه عيشه يتنسى

و لما الحريم ببيع الهوا تتكسي

و لما شرفها تلبسه توب شفتشي

و لما الحق أصبح حجمه ترمسي

و لما الطموح يصبح ظهوره مشمشي

و لما الشباب يوماتي الخمر يحتسي

و لما الشيطان من افعلنا يختشي

و لما ذنوبنا في قلب كتابنا تتحشي

* * * *

جالا جالا جالا

قالك أية قالك آه

قالك يا بن ادم ها نوريك العجب

الزمن بريء و أنت السبب

فوق يا أخينا و انسي الدهب

انسي المجون و انسي الصخب

انسي المراكز و الخطب

فكر في حالنا و السبب

وقت الفوقان خلاص وجب
بقلم / هاجر العشري

الأحد، 13 يوليو 2008

سَكـَـــرَات وطــــــن


عنوان الشقا ع الجبين مرسوم

و عيون بتبكي و ع الزمن بتلوم

و بطون من الجوع تصرخ تقول محروم

و الوجع دابب في قلب كله هموم

و المر واصل مالقلب للبلعوم

و أسراب من العذاب فوق في السما بتحوم

و صوت قنابل في الودان بتذوم

و وليد في حضن أمه مصيره محتوم

و شعر الجنين شاب قبل ما يقوم مالنوم

و دموع أم ولادها بيموتوا كل يوم

و أب بيودع صبيه صغير مرحوم

و نار و شرار في قلب كل القوم

ع اللي بناره حرقنا في يوم مشئوم

يا رب النصر من عندك في يوم معلوم

بوحدة صف نتجمع سوا و نقوم

و ننصر كلمة الحق و نرفع راسنا للنجوم
و نهزم بأيد واحدة عدو الشوم
بقلم / هاجر العشري

السبت، 5 يوليو 2008

علي كل لون يا بتسطـــــا



على كل لون يا بتسطا

صحبتنا ظبطاها ألِسطا

و في الفتاكة دي أسطا

و كله بقي في الالشطة

* * * *

واخدة في الشغل راحتها

فاكرة خلاص البيت بيتها

و الكون بقي مملكتها

ولا حد في الدنيا شريكها

* * * *

واكلة خلاص الخير كله

و الفُم ماليان علي سِنه

و الكل مخروس اكمنه

مرتبه ها يروح منه

* * * *

واخدة الإدارة بوضع اليد

و ظلمها اهو فاق الحد

و شرها خلاص احتد

ولا عمرها تفكر في حد

* * * *

فالحة بس تهين في الناس

و في الشر وسواس خناس

ولا بتحس هموم الناس

أمتي يا رب تذل في ناس

* * * *

و في الأذية دي تدي دروس

و ع الغلابة دايما تدوس

تاجها و راسها هو الفلوس

ولا هما أبو مين مفروس

* * * *

و ع الورق تلعب لعبتها

و اختلاس و فلوس عَبتها

و بالحرام لفت رقبتها

قادر يا رب تخرب بيتها

* * * *

ركبت خلاص و هزت رجليها

و بالدهب ملت أيديها

و ريش نعام ميل عليها

و في الوحل غرقانه رجليها

* * * *

هو موشح دايره تقوله

قال الله و قال رسوله

ولا بستان م الجنة تطوله

طول ما دينها ما تعرف أصوله

بقلم / هاجر العشري